Segja forsætisráðherra hafa skaðlegt viðhorf

„Viðhorf forsætisráðherra gagnvart erlendri fjárfestingu elur á tortryggni,“ sagði Ásdís Kristjánsdóttir, forstöðumaður efnahagsdeildar Samtaka atvinnulífsins, í pallborði í gær á opnum morgunfundi samtakanna um beina erlenda fjárfestingu.

„Það er eins og Íslendingar óttist alltaf að fjárfestar sem koma hingað til landsins ætli sér að taka allan arð sinn úr landi og skilja ekkert eftir. Auðvitað vænta fjárfestar þess að taka til sín einhvern arð, en það gleymist hins vegar að það verður alltaf virðisauki eftir í landinu, svo sem skatttekjur, aukin atvinna og launatekjur og kaup á innlendum afurðum. Ummæli forsætisráðherra um að erlend fjárfesting sé eins og erlend lántaka eru einfaldlega skaðleg,“ sagði Ásdís enn fremur á fundinum.

Annar aðalframsögumanna fundarins var Írinn Frank Barry, prófessor í alþjóðaviðskiptum við Trinity-háskólann í Dublin. Hann sagði frá reynslu Íra í þessum efnum. Barry sagði erlenda fjárfestingu þar hafa byrjað árið 1956 þegar fyrirtækjaskattur var fyrst lækkaður í landinu.

„Hagkerfi sem hafa talið það nýtast sér að lækka fyrirtækjaskatta eru oftast lítil jaðarhagkerfi sem iðnvæddust seint. Erlend fjárfesting er mikilvægari fyrir slík hagkerfi sem oft velja því að lækka slíka skatta,“ sagði Barry í erindi sínu og vildi meina að saga Írlands gæti gagnast Íslendingum.

Kristrún Heimisdóttir, framkvæmdastjóri Samtaka iðnaðarins, tók í sama streng og Ásdís.

„Mér finnst það sláandi að við séum stödd á sama stað og Írar voru árið 1956. Við erum samfélag sem er dauðhrætt við erlenda fjárfesta, teljum það vera einhvers konar ásælni að vilja koma hingað,“ sagði Kristrún.

Hún sagði nauðsynlegt að breyta umræðunni.

„Það þarf að breyta þessu viðhorfi, við förum alltaf út í að segja draugasögur eða tröllasögur af útlendingum,“ sagði Kristrún.

Guðbjörg Edda Eggertsdóttir, forstjóri Actavis á Íslandi, tók dæmi af Möltu þar sem stjórnvöld hafi sett sér skýra stefnu um að laða að sér erlenda fjárfesta. Um tólf mismunandi lyfjafyrirtæki hafa ákveðið að setja upp verksmiðjur eða þróunarstarfsemi þar í landi, þar á meðal Actavis.

„Það er ljóst að Ísland hefði ekki orðið fyrir valinu hjá eigendum fyrirtækisins ef það væri sett á laggirnar í dag,“ sagði Guðbjörg.