Landsnet mun taka jarðir á Suðurnesjum eignarnámi

Iðnaðar- og viðskiptaráðherra hefur heimilað Landsneti hf. að gera eignarnám í jörðum á Suðurnesjum til að hægt sé að leggja 220 kV háspennulínu á milli Hafnarfjarðar og Reykjanesbæjar.

Eignarnámið er liður í því að styrkja raforkuflutningskerfi á svæðinu, en nýja línan mun hljóta nafnið Suðurnesjalína 2.

Samningaviðræður ríkisins við jarðeigendur á svæðinu leiddu ekki til þess að eigendurnir vildu selja aðgang að jörðum sínum og eignarnámið mun veita Landsneti hf. afnotarétt af jörðunum til að leggja og viðhalda raflínunum.

Jarðeigendurnir munu hljóta eignarnámsbætur samkvæmt lögum um framkvæmd eignarnáms.