Jónas Þór kjörinn stjórnarformaður Landsvirkjunar

Á aðalfundi Landsvirkjunar, sem haldinn var í dag, var samþykkt tillaga fjármála- og efnahagsráðherra um kjör aðalmanna og varamanna í stjórn Landsvirkjunar. Þetta kemur fram í fréttatilkynningu frá Landsvirkjun.

Aðalmenn í stjórn Landsvirkjunar voru kjörnir: Jónas Þór Guðmundsson, hæstaréttarlögmaður og formaður Lögmannafélags Íslands, Helgi Jóhannesson, hæstaréttarlögmaður, Jón Björn Hákonarson, forseti bæjarstjórnar Fjarðabyggðar, Þórunn Sveinbjarnardóttir, framkvæmdastýra Samfylkingarinnar og Álfheiður Ingadóttir, líffræðingur.

Varamenn í stjórn Landsvirkjunar voru kjörnir: Páley Borgþórsdóttir, Teitur Björn Einarsson, Ásta Björg Pálmadóttir, Skúli Helgason og Steinþór Heiðarsson.

Aðalfundurinn staðfesti skýrslu fráfarandi stjórnar og samstæðureikning fyrir liðið reikningsár.

Á aðalfundinum var jafnframt samþykkt tillaga stjórnar um arðgreiðslu til eigenda að fjárhæð 1,5 milljarðar króna fyrir árið 2013.

Á aðalfundinum var Deloitte ehf. kosið endurskoðunarfyrirtæki Landsvirkjunar að fenginni tillögu Ríkisendurskoðunar, sem efndi til útboðs á endurskoðun reikninga Landsvirkjunar í mars 2014.

Var niðurstaðan sú að ganga til samninga við endurskoðunarfyrirtækið Deloitte ehf.

Orðrómur hafði verið uppi um að Davíð Oddsson, ritstjóri Morgunblaðsins, myndi taka sæti í stjórn Landsvirkjunar en svo er ekki.