Upphafskvótinn aðeins 260 þúsund tonn

Upphafskvóti á komandi loðnuvertíð verður aðeins 260 þúsund tonn ef farið verður að nýjum ráðleggingum Hafrannsóknastofnunar. Kvóti íslenskra skipa gæti orðið langt innan við 200 þúsund tonn, vegna hlutdeildar annarra landa í kvótanum, þá einkum Norðmanna.

Útflutningsverðmæti af afla Íslendinga gæti numið 10 til 15 milljörðum króna, samkvæmt útreikningum Fiskifrétta, eða álíka og af síðustu vertíð, en verðmætið var 33 milljarðar á vertíðinni þar á undan.

Hafrannsóknastofnun mun aftur mæla stofninn upp úr áramótum, og binda hagsmunahópar vonir við að nýjar mælingar gefi tilefni til að auka við kvótann, eins og oft hefur gerst.