Rússneskir hermenn hörfa frá Úkraínu

Talsmaður Atlantshafsbandalagsins segir að umtalsverður hluti rússneskra hermanna hafi hörfað frá austurhluta Úkraínu og aftur inn í Rússland. Nokkrar hersveitir séu þó enn innan landamæranna.

Hershöfðinginn Jay Janzen segir það erfitt að segja til um það með vissu hversu margir rússneskir hermenn séu í Úkraínu þar sem aðskilnaðarsinnar ráði enn yfir nokkrum landamærastöðvum.

Rússnesk stjórnvöld hafa hafnað ásökunum um að hafa útvegað aðskilnaðarsinnum á bandi Rússlandsstjórnar vopn og að hafa sent hersveitir til héraðanna Donetsk og Luhansk.

Rúmlega 3.200 manns hafa fallið í átökum í landinu frá því að þau hófust í apríl síðastliðinn.

Ríkisstjórnin í Úkraínu og aðskilnaðarsinnar sammæltust á laugardaginn um friðaráætlun til að binda endi á átökin sem geisað hafa í austurhluta landsins síðustu mánuði.

Áætlunin er í níu liðum og felst meðal annars í að koma upp þrjátíu kílómetra löngu hlutlausu svæði, banni við flugi herþotna yfir ákveðið landsvæði í austurhluta Úkraínu og bann við þjónustu erlendra málaliða.

Ákveðið var að vinna að gerð samkomulagsins á fundi Petró Pórósjenkó Úkraínuforseta og Vladimír Pútín Rússlandsforseta í hvítrússnesku höfuðborginni Minsk þann 5. september þar sem samið var um vopnahlé.