Stýrihópur endurskoðar virðisaukaskatt og vörugjöld

Horfið verður frá sértækri neyslustýringu með vörugjöldum og virðisaukaskattskerfið einfaldað með minni mun á milli þrepa, færri undanþágum og auknu jafnræði milli skyldra atvinnugreina í kjölfar endurskoðunar á vörugjalda- og virðisaukaskattskerfunum. Að endurskoðuninni vinnur stýrihópur sem Bjarni Benediktsson, fjármála- og efnahagsráðherra hefur skipað. Frá þessu greinir á vef ráðuneytisins.

Bjarni greindi fyrst frá þessum fyrirætlunum ríkisstjórnarinnar á skattadegi Deloitte í janúar.

Meðal verkefna hópsins er að leita leiða til að breikka skattstofna og sporna við skattsvikum til að unnt verði að létta skattbyrði almennings og fyrirtækja auk þess sem meta skal mögulegar mótvægisaðgerðir til að mæta þörfum tekjulægri hópa.

Á vef fjármálaráðuneytisins segir að ljóst sé að brýn þörf er á að endurskoða virðisaukaskattskerfið. Er efra þrepið eitt það hæsta í heimi en skilvirkni kerfisins helst ekki í hendur við hátt skatthlutfall. Hefur það gefið verulega eftir á síðari árum, bæði sem hlutfall af heildarskatttekjum ríkisins og landsframleiðslu.

Stýrihópurinn mun setja á fót starfshópa sem vinna skulu að afmörkuðum þáttum í endurskoðuninni. Þá munu ráðgjafaráð fjármála- og efnahagsráðherra um efnahagsmál og opinber fjármál og sérfræðingateymi AGS starfa með stýrihópnum og einstökum starfshópum hans. Einnig er stýrihópnum ætlað að hafa reglubundið samráð við hagsmunasamtök launþega og vinnuveitenda og aðra þá sem hagsmuna eiga að gæta.

Í hópnum eiga sæti þrír fulltrúar fjármálaráðuneytis, þau Guðrún Þorleifsdóttir, lögfræðingur, Maríanna Jónasdóttir, skrifstofustjóri og Tómas Brynjólfsson, skrifstofustjóri.

Fyrstu skref verða stigin til breytinga með frumvarpi sem lagt verður fram á þinginu 2014-2015.