Sveppur seldist á 7,7 milljónir

Heimsins stærsti trufflu-sveppur var seldur á uppboði um helgina. Sveppurinn seldist á 7,7 milljónir, sem er talsvert lægri upphæð en næststærsti sveppur sögunnar seldist á.

Trufflu-sveppir eru einnig kallaðir jarðkeppir og hallsveppir á okkar ástkæra, ylhýra.

Sveppurinn fannst í síðustu viku í Umrian-héraðinu á Ítalíu og var 1,89 kílógrömm að þyngd. Sá sem keypti sveppinn er frá Taívan.

Starfsmaður fyrirtækis sem sérhæfir sig í því að leita að trufflum fann sveppinn. Fyrirtækið heitir Sabatino Truffles og forseti þess heitir Federico Balestra. Hann er vitanlega í skýjunum með söluna. „Þetta er ótrúlegt, alveg ótrúlegt,“ segir hann og bætir því við að starfsmaðurinn hafi notið aðstoðar hvolps við að finna trufluna. Lyktarskyn hunda kemur sér vel þegar finna á trufflur, því þær eru oft talsvert undir yfirborðinu. Sérstakir leitarhundar eru þjálfaðir til þess að finna trufflurnar og er finnast flestar þeirra á tilteknum svæðum á Ítalíu, í Frakklandi auk þess sem trufflur hafa fundist í Króatíu og Slóveníu. Þær finnast yfirleitt í október, nóvember og desember. 

„Yfirleitt eru það reynslumeiri, eldri hundarnir sem finna svona stóra sveppi. Trufflur að þessu tagi geta verið allt að fjörutíu sentímetra undir yfirborðinu,“ útskýrir Balsetri. Fyrirtækið gaf ágóðann af sölunni til góðgerðamála, meðal annars til samtaka sem gefa heimilislausum mat og samtaka sem styðja við börn með gláku.

Samkvæmt Heimsmetabók Guinness var stærsta trufflan, áður en þessi fannst, 1,31 kílógrömm að þyngd. Sú fannst Króatíu árið 1999. Sérstaklega þjálfuð svín hafa einnig verið notuð til þess að finna trufflur, eins og sjá má hér að neðan. Búið er að taka fyrir notkun svína til þess að finna trufflur á Ítalíu. Lög voru sett árið 1985 um málið, því svínin voru talin skaða svepparæktun. 

Hlutfallslega var verðið á sveppnum sem seldist um helgina talsvert lægra en á þeim næststærsta sem seldur hefur verið á uppboði. Sá var næstum því helmingi léttari en seldist á 52 milljónir króna. Í kjölfar þess að það spurðist út að heimsins stærsta truffla hefði fundist fóru sögusagnir af stað að kínverskir matarunnendur væru tilbúnir að greiða eina milljón bandaríkjadala, eða 125 milljónir króna, fyrir hana. En verðið var töluvert lægra en það; 7,7 milljónir króna sem runnu til góðgerðamála.

Hér að neðan má sjá nokkur myndbönd af því þegar leitað er að trufflum.