Gósentíð í Eyjum

Svo virðist sem íbúar Vestmannaeyja hafi mest fé milli handa allra landsmanna en samkvæmt upplýsingum sem birtust í svari fjármálaráðherra við fyrirpurn um tekjur ríkissjóðs greiða þeir mest í tekjuskatt.

Vísir hefur áður fjallað um að vel ári í Eyjum en þar gekk smásala fyrir jól vonum framar og Eyjamenn keyptu sér upp til hópa fínustu sjónvörpin, en þau hafa löngum talist góður barómeter á velsældina.

Veftímaritið T24 gerir sér mat úr svari fjármálaráðherra og segir frá því að hver Eyjamaður hafi greitt að meðaltali liðlega 521 þúsund krónur í tekjuskatt til ríkisins árið 2012 sem er um 60 prósent hækkun frá árinu 2009.

Samkvæmt upplýsingum um tekjuskatt miðað við ólíka landshluta þá hafa Garðbæingar það næstbest á landinu en þeir greiddu rúmlega 509 þúsund í tekjuskatt árið 2012 og í Fjarðarbyggð nam tekjuskattur á hvern íbúa um nær 507 þúsund krónum. Seltirningar hafa það einnig gott í samanburði við aðra landsmenn, eru í fjórða sæti. Samkvæmt því sem fram kemur í svari fjármálaráðherra kemur fram að tekjuskattur hafi numið liðlega 110 milljörðum króna árið 2012 og hækkaði hann um 16,8 milljarða frá 2009 eða um 18 prósent.