Sjónvörp seljast sem heitar lummur í Eyjum

Smásala gekk ekki mjög vel yfir jólin. Opinberar tölur segja til um að smásalan hafi dregist saman um tæp tíu prósent sé miðað við í fyrra. Þetta er samkvæmt upplýsingum frá Nýherja. Nema, í Eyjum. Þar voru menn duglegir við að fá sér góðar græjur.

„Jújú, það gekk ljómandi vel. Við kvörtum ekki,“ segir Pétur Jóhannsson verslunarstjóri í Geisla, raftækjaverslun í Eyjum. Hann segist ekki vera með neinar tölur fyrirliggjandi en það sé rétt, Eyjamenn hafi ekki skorið við nögl þegar þeir fengu sér til að mynda ný sjónvörp – sem þykja góður barómeter á efnahagsástand afmarkaðra svæða. „Dýrasta og flottasta? Ég segi það ekki, en, jú, við erum með gott úrval og breiða línu. Við höfum verið að selja mikið af dýrari tækjum líka,“ segir Pétur og er kátur. „Spurning hvað maður kallar dýr tæki. Það er matsatriði. Sumum finnst þessi tæki dýr og öðrum ekki. Jújú, þetta eru tæki í dýrari kantinum.“

Pétur segir að atvinnustig sé gott í Eyjum og þar sé stór hópur, bæði sjómenn og landverkafólk, sem er hátekjufólk.

Eyjólfur Jóhannsson er innkaupa- og sölustjóri Sony-sjónvarpstækja hjá Nýherja. Geisli tekur meðal annars vörur frá Nýherja og Eyjólfur segir það rétt, Eyjamönnum hafi gengið vel og komið betur út en flest önnur svæði landsins – spurður hvort Eyjamenn hafi verið grimmastir í að kaupa sér sjónvarpstæki. Dýrustu sjónvörp í almennri sölu hjá Sony eru rétt um tæp milljón króna en þar er verið að tala um 4K, næsta kynslóð sjónvarpa. „Við munum sjá meira af þeim á næstu árum. Svo eru náttúrlega hagstæð gæðatæki frá 150 þúsundum, sem gera allt sem menn biðja þau um. Eyjamönnum gekk mjög vel í því sem kallað eru „brún tæki“, hljóð og mynd (hvít tæki teljast þvottavélar, þurrkarar, ísskápar og frystiskápar) - þetta er smekkfólk, Vestmannaeyingar.“