Bandalag háskólamanna lýsir fullum stuðningi við prófessora

BHM, Bandalag háskólamanna, lýsir fullum stuðningi við kjarabaráttu Félags prófessora við ríkisháskóla og sanngjarnar kröfur þeirra um launaleiðréttingu en þetta kemur fram í tilkynningu frá BHM.

Þar segir að stjórn BHM árétti að öflug menntun sé undirstaða framþróunar á íslenskum vinnumarkaði og því afar brýnt að æðstu menntastofnanir landsins séu starfhæfar.

Prófessorar hafa verið samningslausir frá 1. apríl síðastliðinn.

„BHM skorar á viðsemjendur að leggja allt kapp á að samningar takist tafarlaust.“

Yfirgnæfandi meirihluti þeirra sem kusu í atkvæðagreiðslu Félags prófessora við ríkisháskóla um boðun verkfalls samþykktu verkfallsaðgerðir.

313 voru á kjörskrá og greiddu 242 atkvæði eða 77,3%. „Já“ sögðu 195 eða 80,6% og „nei“ sögðu 47 eða 19,4%.