Kringlan stækki um 20 þúsund fermetra

Áform um stækkun Kringlunnar hafa legið fyrir lengi. Um er að ræða byggingarreiti í Kringlunni 1 og 3 og yrði kostnaður við framkvæmdir talinn í milljarðatugum.

Verði hugmyndir fasteignafélagsins Reita að veruleika verður Kringlan sjálf stækkuð um 20 þúsund fermetra en horft er til framkvæmda upp á allt að 70 þúsund fermetra af nýju húsnæði á svæðinu. „Hugmyndirnar fela í sér að verslunarrými Kringlunnar verði aukið verulega til vesturs, með viðbyggingu frá gömlu Borgar-Kringlunni, yfir götuna og yfir á svæðið þar sem gamla Morgunblaðshúsið og prentsmiðjan standa. Þau hús myndu þá víkja.

Í meðfylgjandi myndskeiði  sést hvernig ásýnd svæðisins yrði frá Kringlumýrarbraut en markmiðið er að skapa nútímalegt borgarumhverfi með blandaðri byggð verslunar og þjónustu, skrifstofu- og íbúðarhúsnæðis, menningar og afþreyingar. Gert er ráð fyrir um 250 nýjum íbúðum á svæðinu og hóteli í turni sem rísa myndi norðan megin við Kringluna.

„Allt frá hruni hefur enginn verslunarfermetri í Kringlunni verið laus. Hér hafa öll pláss verið full, það er eftirspurn eftir því að komast inn í Kringlu en auðvitað segir sig sjálft að ef við förum í þessar framkvæmdir þarf að undirbúa það vel, meðal annars með því að tryggja ákveðna nýtingu í húsinu frá fyrsta degi,“ segir Guðjón Auðunsson, forstjóri Reita fasteignafélags.

Guðjón segir endanlegt samþykki borgaryfirvalda fyrir öllum fyrirhuguðum framkvæmdum ekki liggja fyrir en að viðræður séu komnar vel af stað. Hann kveðst ekki geta áætlað hvenær til framkvæmdanna komi. „En ég  trúi því að innan næstu sjö til tíu ára ættum við að sjá aðeins öðruvísi landslag hér á Kringlureitnum hvað varðar framkvæmdir og byggingar.“