Hækka fjármagnslið félagslegra íbúða um 13%

Leiga á félagslegum íbúðum á Akureyri, sem eru í eigu Búseta á Akureyri, hækkar um 13 prósent þann 1. janúar næstkomandi. Þessi hækkun á leigu er langt umfram verðbólgu.

Þetta tilkynnti Búseti í dreifibréfi til leigutaka þar sem fram kemur að forsendubrestur hafi orðið í fjármögnun á félagslegum leiguíbúðum félagsins.

Leigjendur þessara íbúða eru oftar en ekki tekjulágir einstaklingar sem hafa lítið á milli handanna. Þeir íbúar sem Fréttablaðið náði tali af í gær sögðu þetta munu leggjast þungt á fjárhaginn hjá þeim. Tekjur þeirra eða húsaleigubætur hækkuðu ekki til jafns á við þessa hækkun.

Tómas Veigar Sigurðarson, íbúi í einni slíkri íbúð segir þetta einnig ósanngjarna hækkun. „Leigan á félagslegum íbúðum Búseta hækkar miklu meira en á hinum almenna eignum búsetufélagsins. Nú er verið að færa skuldir þaðan yfir á félagslega kerfið.“

Í leigusamningnum segir hinsvegar að íbúðin beri kvaðir vegna sértækra lánaskilmála. Hluti þeirra kvaða sem hvíla á íbúðunum eru þær að breytingar á leigugjaldi eru settar skorður og heimilar reglugerð frá árinu 2013 ekki hækkun umfram vísitölu. 

Benedikt Sigurðarson, framkvæmdastjóri Búseta á norðurlandi, segir ástæðu þess að félagið þurfi að grípa til svo mikilla hækkuna séu þvingandi aðgerðir Íbúðalánasjóðs. 

„Vegna þvingandi kröfu frá Íbúðalánasjoði eru þær veðsettar fyrir viðbótarlánum. Íbúðalánasjóður setur þessar kröfur um að veðsetja eignirnar upp á nýtt. Félagið þurfti á endurfjármögnun að halda og þurftum við að veðsetja þessar íbúðir til að standa straum af rekstri félagsins.“

Sigurður Erlingsson, framkvæmdastjóri Íbúðalánasjóðs, segir forsvarsmenn Íbúðalánasjóðs og Búseta hittast á reglubundnum fundi og fara yfir málin. 

„Við áformum að hittast fljótlega á næsta ári og skoða lánasamninga við Búseta, líkt og við gerum við aðra viðskiptavini Íbúðalánasjóðs.“

Benedikt bendir hins vegar á að félagið lækki á móti önnur gjöld þannig að hækkunin á þessum eignum verður ekki eins há.

„Þetta eru upphaflega eignir með niðurgreiddum lánum og eru um það bil 40 prósent ódýrari en aðrar íbúðir. Eftir breytingu verða þær um 30 prósent ódýrari.“