Þórdís: Nutum hverrar mínútu

Þórdís Ólafsdóttir, fyrirliði íslenska liðsins í blönduðum flokki, var nokkuð sátt með frammistöðu Íslands á lokadegi EM í hópfimleikum sem hefur staðið yfir í Frjálsíþróttahöllinni í Laugardal síðan á miðvikudaginn.

Ísland hafnaði í 5. sæti af sex liðum, en íslenska liðið fékk 51.750 stig fyrir frammistöðu sína í dag. Ísland fékk 18.400 stig fyrir æfingar á gólfi, 16.650 fyrir dýnustökk og 16.700 stig fyrir trampólín.

„Mér fannst þetta ganga rosalega vel. Við bættum okkur á tveimur áhöldum af þremur og við vorum að koma inn með varamann frá undanúrslitunum.

„Við rifum okkur svo sannarlega upp og kláruðum þetta með stæl,“ sagði Þórdís í samtali við Vísi, en hafði það einhver áhrif að þurfa að gera breytingu á liðinu fyrir úrslitadaginn vegna meiðsla Hörpu Guðrúnar Hreinsdóttur?

„Ég gat ekki séð það þar sem við kláruðum áhöldin gríðarlega vel og við nutum þess að vera á gólfinu. Þetta hafði að vissu leyti einhver áhrif, en þetta gat verið verra. Planið hjá þjálfurum var gott og við stóðum okkur ótrúlega vel.

„Þetta gekk betur en í forkeppninni og eins og ég sagði áðan, þá bættum við okkur á tveimur áhöldum. Það voru smá hnökrar á dansinum, en það er eitthvað sem hægt er að vinna með.

„Við nutum hverrar mínútu sem við vorum úti á gólfinu og það var það sem við ætluðum gera númer 1,2 og 3,“ sagði Þórdís að lokum.