Háskólafólk fær frjálsan aðgang að hugbúnaði og skýjaþjónustu Microsoft

Allir nemendur og starfsmenn Háskóla Íslands (HÍ), alls um 17 þúsund manns, munu fá endurgjaldslausan aðgang að nokkrum vinsælustu forritunum frá Microsoft, s.s. Word, Excel, PowerPoint og OneNote.

Þetta felst í samkomulagi sem Reiknistofnun Háskóla Íslands (RHÍ) hefur gert við Microsoft á Íslandi.

Samkomulagið felur einnig í sér aðgang að OneDrive, skýjaþjónustu Microsoft, sem auðveldar notendum að nálgast sín gögn hvar sem er og gerir auðvelt að deila skjölum eða möppum til annarra notanda.

Nemendur HÍ fá nú aðgang að bæði hefðbundnum og netútgáfum af vinsælustu forritunum frá Microsoft, sem þýðir að þeir geta unnið með þau á sínum tölvum bæði í gegnum vafra og sem uppsett forrit. Starfsmenn HÍ fá aðgang að netútgáfum sömu forritanna en geta einnig óskað sérstaklega eftir hefðbundinni uppsetningu á forritunum í tölvum sínum.

Breyttar áherslur á hugbúnaðarmarkaði

Aðgangur að hugbúnaði er í auknum mæli veittur í gegnum netið og sífellt fleiri kjósa að greiða lága upphæð í fast mánaðargjald fyrir aðgang að hugbúnaði í stað þess að kaupa nýjar útgáfur til eignar.

Slík áskriftarþjónusta felur í sér að notendur fá ávallt bestu og nýjustu útgáfu hugbúnaðarins. Nær allur hugbúnaður frá Microsoft er nú vistaður í skýinu og er aðgengilegur í ólíkum tækjum í gegnum vafra.

Samningurinn við RHÍ er í samræmi við stefnu Microsoft um að veita nemendum og starfsmönnum í háskólum um allan heim greiðan aðgang að nýjustu útgáfum af vinsælasta hugbúnaði fyrirtækisins.

Slíkir samningar standa háskólum til boða sem leigja og kaupa annan hugbúnað frá Microsoft. Nýherji, samstarfsaðili Microsoft á Íslandi, annaðist uppsetningu á Office 365 hjá Háskóla Íslands.