Vueling tekur slaginn við WOW um Rómarborg

WOW air verður ekki eitt um að fljúga farþega á milli Rómar og Íslands því spænska lággjaldaflugfélagið Vueling var að hefja sölu á farmiðum á þessari sömu leið. Þetta kemur fram í frétt á vefsíðunni Túristi.

Vueling mun fljúga næturflug héðan á miðvikudögum og sunnudögum og vélarnar lenda í Róm árla dags.

Í haust tilkynntu forsvarsmenn WOW air að félagið myndi fljúga vikulega til Rómar næsta sumar. Þar með bauðst flugfarþegum hér á landi í fyrsta skipti upp á beint áætlunarflug til þessara vinsælu ferðamannaborgar.

Fram kemur í frétt Túrista að ódýrustu fargjöld Vueling á þessari leið séu í dag 14.156 krónur en 20.449 krónur hjá WOW air. Við fargjaldið bætast bókunargjöld og eins rukka bæði félög fyrir innritaðan farangur.

Vueling er eitt stærsta lágfargjaldaflugfélag Evrópu og er eigu IAG Group sem á og rekur flugfélögin British Airways og Iberia.

Jómfrúarferð félagsins hingað frá Róm verður farin 23. júní en þremur dögum síðar hefst áætlunarflug WOW air til borgarinnar.