Stjórnendur Friends Provident skoða riftun og endurgreiðslu

Stjórnendur tryggingarfyrirtækisins Friends Provident sem þúsundir Íslendinga eru í viðskiptum við hafa íhugað að rifta öllum lífeyristryggingarsamningum gerðum eftir 28. nóvember 2008 og endurgreiða iðgjöld, vegna ákvörðunar Seðlabankans um að stöðva sparnað í erlendum á grundvelli samninganna.

Sem kunnugt er hefur Seðlabankinn stöðvað sparnað Íslendinga í erlendum gjaldeyri hjá fyrirtækjum eins og Allianz, Friends Provident og Bayern-Versicherung þar sem bankinn telur að samningar um sparnaðinn gangi í berhögg við gjaldeyrishöftin.

Seðlabankinn hefur veitt fjögurra mánaða aðlögunartíma til að bregðast við en sem stendur eru þessi fyrirtæki ennþá að fá sparnað í evrum frá íslenskum viðskiptavinum sínum. 



Funduðu með Seðlabankanum í dag

Fulltrúar frá tryggingarfyrirtækinu Friends Provident eru á Íslandi og funduðu í dag með starfsmönnum Seðlabankans vegna lífeyristryggingarsamninga sem Seðlabankinn telur ólöglega.

Milljarðahagsmunir eru í húfi fyrir fyrirtækið vegna viðskiptavina þess hér á landi sem munu ekki geta greitt inn á samninganna vegna túlkunar Seðlabankans á lögum um gjaldeyrismál.

35-37 þúsund Íslendingar gerðu samninga af þessu tagi eftir 28. nóvember 2008 þegar höftin voru lögfest. Seðlabankinn hefur flokkað þessa samninga og stór hluti þeirra er ólöglegur. Þurfa þessir einstaklingar og hin erlendu tryggingarfyrirtæki að umbreyta samningunum í krónur að kröfu Seðlabankans. 

Amanda Giscos svæðisstjóri Friends Provident sagði í skriflegu svari til Stöðvar 2 að fyrirtækið gæti að svo stöddu ekki tjáð sig um fundinn með Seðlabankanum.

Óánægja tryggingamiðlara og hinna erlendu fyrirtækja, Allianz, Friends Provident og Bayern-Versicherung er ekki síst til komin vegna upplýsinga sem þau fengu frá Seðlabankanum á fyrri stigum. 

Eins og þessi tölvupóstur (sjá myndskeið) sem starfsmaður gjaldeyriseftirlits Seðlabankans sendi Tryggingamiðlun Íslands hinn 14. janúar 2010 en þar segir orðrétt: „Seðlabankinn lítur svo á að greiðslur vegna eingreiðslulíftrygginga, sem fyrirspurn þín lítur að, feli í sér kaup á þjónustu.“

Vöru og þjónustuviðskipti eru undanþegin höftum. Starfsmaðurinn er þannig að segja, þessir samningar sleppa.

Hvetur viðskiptavini að halda ró sinni

Fréttastofan hefur heimildir fyrir því að stjórnendur Friends Provident hafi íhugað, í kjölfar ákvörðunar Seðlabankans, að segja upp öllum lífeyristryggingarsamningum hér á landi og endurgreiða iðgjaldagreiðendum, þ.e. viðskiptavinum sínum. Þetta mun koma fram í bréfi sem fyrirtækið sendi Samtökum verslunar og þjónustu.

Már Guðmundsson seðlabankastjóri segir að Seðlabankinn hafi nú þegar fundað með fulltrúum allra fyrirtækjanna, Friends, Bayern og Allianz. Hann hvetur viðskiptavini þeirra hér á landi að halda ró sinni gagnvart því sem hann álitur hagsmunabaráttu. Már segir að Seðlabankinn vinni að því að finna lausn sem henti öllum þeim sem gerðu samninga við hin erlendu tryggingafyrirtæki í góðri trú. Slík vinna taki hins vegar tíma.