Svipmynd Markaðarins: Ætlar að sjá Gunnar Nelson í Svíþjóð

„Ég rak áður Glerslípun og speglagerð sem var minna fyrirtæki í þessum bransa og elsta glerfyrirtæki landsins stofnað árið 1922,“ segir Rúnar Árnason, framkvæmdastjóri Glerborgar, spurður hvernig það kom til að hann fór að stýra fyrirtækinu í september í fyrra.

Rúnar hafði starfað sem framkvæmdastjóri Glerslípunar og speglagerðar í þrjú ár þegar hann ákvað ásamt föður sínum að kaupa Glerborg og sameina fyrirtækin.

„Við stukkum á tækifærið þegar við sáum að fyrirtækið var til sölu. Það hefur gengið nokkuð vel að fara inn í þetta hlutverk en það var að mörgu að huga,“ segir Rúnar.

Hann er stúdent frá Verslunarskóla Íslands og lauk námi í viðskiptafræði frá Háskólanum á Bifröst árið 2007. Eftir það lá leiðin í Háskólann í Reykjavík en Rúnar útskrifaðist þaðan með meistaragráðu í fjármálum fyrirtækja árið 2009.

„Þá datt ég inn í laxeldisfyrirtækið Fjarðalax og tók þátt í þeirri uppbyggingu frá byrjun en það fyrirtæki var stofnað haustið 2009. Þá sinnti ég einnig starfi framkvæmdastjóra Glerslípunar og speglagerðar en við kaupin á Glerborg var ekki nægur tími til að sinna öllum þessum verkefnum og ég fór því á fullt í glerið. En það var góð reynsla að taka þátt í þessu þarna fyrir austan enda Fjarðalax frábært fyrirtæki.“

Rúnar segir að verkefnum fyrirtækisins hafi fjölgað mikið á þessu ári og nefnir framkvæmdir við hótel og önnur verkefni sem nú eru í gangi í byggingariðnaði. Hann nefnir sem dæmi framkvæmdir við hótel Íslandshótela við Höfðatorg.

„Þar sjáum við um alla sturtuklefa, spegla og gler. Það er heljarinnar framkvæmd enda 320 herbergi. Hvað svo sem hver segir um hótelbyggingar og hvernig þetta endar allt saman er vöxtur í ferðamannabransanum stór partur af okkar starfi núna,“ segir Rúnar.

Hann æfði lengi körfubolta með Fjölni og segir að sá frítími sem hann hafi fari meðal annars í bumbubolta með félögunum.

„ Þetta er fínn tími til að hitta félagana og hreyfa sig í leiðinni. Svo er ég alltaf að verða meiri og meiri áhugamaður um blandaðar bardagalistir. Ég er einmitt að fara til Svíþjóðar að sjá Gunnar Nelson næstu helgi. Ég er mjög spenntur fyrir þeim bardaga og hef tröllatrú á okkar manni.“

Ólafur Páll Árnason, ráðgjafi hjá AGR ehf.

„Ég kynntist Rúnari fyrir 16 árum þegar ég mætti á körfuboltaæfingu í nýju hverfi og hann setti þrist í andlitið á mér. Frá þeim degi höfum við deilt aragrúa af góðum stundum og lífsreynslu saman í gegnum skóla, íþróttir, ferðalög og heimspekilegar samræður um tónlist og lífið sjálft. Einn af hans helstu kostum er sá hversu traustur vinur hann er. Hann er alltaf til í að réttaa hjálparhönd eða standa í veseni þegar vinur þarf á honum að halda.

Það kemur ekkert á óvart að Rúnar sé farinn að láta að sér kveða í atvinnulífinu enda fæddist maðurinn með gott auga fyrir viðskiptatækifærum. Hann sýnir frumkvæði og hefur metnað fyrir því að skila öllu vel af sér sem hann tekur sér fyrir hendur.“

Kristín Helgadóttir, starfsmannastjóri Fjarðalax

„Fyrstu kynni mín af Rúnari voru þegar ég hóf störf hjá Fjarðalaxi sem var þá lítið fyrirtæki í uppbyggingarfasa. Rúnar sá um bókhaldið og launin og innleiddi margt af því sem við notum enn í dag. Rúnar sló mig strax vel, hann er skemmtilegur, afar vel gefinn og skarpur, einstaklega lausnamiðaður. Hann er með mjög góðan húmor og sá alltaf spaugilegar hliðar á frekar þurru viðfangsefni.

Það var sama hvert viðfangsefnið var, Rúnar leysti alltaf strax og vel úr hlutunum. Eftir að Rúnar varð forstjóri Glerborgar hætti hann að vinna fyrir Fjarðalax sökum anna en við höfum þó ekki alveg sagt skilið við hann, því hann starfar með okkur í eldis­stöðinni Ísþór og sér um launin þar.“