Segir tillögu um lækkun launa forstjóra Haga ótæka

Harpa Ólafsdóttir, stjórnarformaður Gildis lífeyrissjóðs, segir að tillaga um að fulltrúi sjóðsins í stjórn Haga fari fram á að ráðningarsamningur við forstjóra fyrirtækisins verði endurskoðaður sé ótæk. Ekki sé hægt að ætla eina fulltrúa sjóðsins í stjórn verslunarfyrirtækisins að leggja tillöguna fram.

Tillagan kom upphaflega frá Erni Pálssyni, framkvæmdastjóra Landssambands smábátaeigenda og fulltrúa í fulltrúaráði sjóðsins. Örn lagði hana fram á ársfundi Gildis í lok apríl en í tillögunni er miðað við að laun, hlunnindi og árangurstengdar þóknanir forstjóra Haga fari ekki umfram þrjár milljónir króna á mánuði.

Mánaðargreiðslur forstjórans eru þar sagðar vera sex milljónir króna. Jafnframt er lagt til að ráðningarsamningar annarra stjórnenda fyrirtækisins verði endurskoðaðir.

Tillögunni var vísað til stjórnar Gildis en hún hefur ekki verið lögð fram á stjórnarfundum Haga.

„Við getum ekki gert þetta með þeim hætti að ætla einum stjórnarmanni að fara fyrir okkar hönd með þessa kröfu. Þeir sem eru stjórnarmenn í Högum vinna eftir sinni sannfæringu þó svo að við eigum þarna stóran hlut og höfum vissulega einhverja sýn á þessi launamál,“ segir Harpa.

„Tillagan er ekki tæk enda var á ársfundinum farið yfir lagaleg rök hennar og þau halda ekki. Hins vegar hlutu þessi sjónarmið mikinn hljómgrunn á ársfundinum enda höfum við lengi haft af þessu áhyggjur,“ segir Harpa.

Lífeyrissjóðurinn á 10,3 prósenta hlut í Högum. Stjórn sjóðsins starfar, að sögn Hörpu, eftir hluthafastefnu sem mótuð var á síðasta ári. 

„Í þeirri stefnu erum við með ákveðinn ramma þar sem við horfum til þess með hvaða hætti eigi að ákveða laun, bæði stjórnarmanna og stjórnenda. En við keyptum okkur inn í Haga löngu áður en sú stefna var mótuð. Þar er vandinn. En vissulega höfum við okkar skoðanir á málinu og ákveðnar áhyggjur í þeim efnum.“

Árni Hauksson, stjórnarformaður Haga, segir í ársskýrslu fyrirtækisins, sem kom út á mánudag, að laun stjórnenda séu „hressilega tengd árangri þeirra í starfi“. Launin hafi verið góð sökum þess mikla árangurs sem stjórnendur hafi náð í sínum störfum. 

„Þetta eru há laun. Það er ekki hægt að neita því. Spurningin er hins vegar hvað er hægt að gera. Stjórn Haga hefur með þetta að gera og nú er ársfundur fyrirtækisins í þessari viku og þá kemur væntanlega ný stjórn,“ segir Harpa.