Vilja lækka laun forstjóra Haga um helming

„Stjórn Haga samþykkir að ráðningasamningur við forstjóra Haga verði tekinn til endurskoðunar þannig að mánaðarleg laun, hlunnindi og árangurstengdar þóknanir fari ekki umfram þrjár milljónir. Jafnframt verði ráðningasamningar annarra stjórnenda fyrirtækisins teknir til endurskoðunar þar sem sambærilegar greiðslur verði innan hóflegra marka.“ Þetta kemur fram í tillögu Arnar Pálssonar, framkvæmdastjóra Landssambands smábátaeigenda.

„Ef ekki gengur að leiðrétta þetta með þeim hætti þá sé ég ekki aðra leið en að einfaldlega segja þessum samningum upp og auglýsa stöðurnar,“ segir Örn í samtali við Vísi, en Gildi er stærsti hluthafi Haga með 10,32 prósenta eignarhlut.

Rúmlega 72 milljónir í árslaun

Forstjóri Haga, Finnur Árnason, fékk 72,8 milljónir króna í laun á síðasta ári, sem gera rúmlega sex milljónir á mánuði. Samkvæmt ársreikningum Haga fékk forstjórinn 44,5 milljónir í laun og hlunnindi og 28,3 milljónir í árangurstengdar þóknanir.

„Ég hef vakið máls á þessu undanfarin ár. Það er fullkomlega óeðlilegt að lífeyrissjóður standi að fyrirtækjum sem ekki hafa þokkalegt siðferði í launamálum stjórnenda,“ segir Örn.

Siðferðislaust af hálfu lífeyrissjóðsins

Tillaga hans snýr að ákvæði í samskipta- og siðareglum fyrir stjórn og starfsmenn Gildis. Tillagan verður borin upp á ársfundi Gildis sem haldinn verður á Grand Hóteli í kvöld.  Verði tillagan samþykkt sem ályktun verður fulltrúa Gildis í stjórn Haga falið að bera fram eftirfarandi tillögu á næsta stjórnarfundi fyrirtækisins. 

„Sjóðurinn fjárfestir í samfélagslega ábyrgum fyrirtækjum sem fylgja lögum og reglum samfélagsins og viðurkenndum viðmiðunum um góða stjórnarhætti og viðskiptasiðferði. Sjóðurinn fjárfestir ekki í fyrirtækjum sem ofbjóða siðferðisvitund almennings með ósanngjarnri framkomu gagnvart starfsfólki s.s. varðandi kjör og stjórnunaraðferðir eða með óhófi í launamálum stjórnenda sem og öðrum rekstrarþáttum. Stjórn tekur afstöðu til slíkra mála sem upp koma og ákveður hvort selja eigi hlut sjóðsins í ljósi þeirra viðbragða sem athugasemdir við óeðlilega starfshætti fá,“ segir í tillögu Arnar og ítrekar hann í samtali við Vísi að slíkir starfshættir séu siðferðislausir.

Hrein eign Gildis lífeyrissjóðs til greiðslu lífeyris eru 334 milljarðar og heildariðgjöld sjóðfélaga 13,7 milljarðar. Raunávöxtun samtryggingadeildar sjóðsins voru 5,3 prósent.  Þetta kemur fram í ársskýrslu lífeyrissjóðsins 2013.