NORR11 til landsins

Í næsta mánuði stendur til að skandinavíska húsgagna- og hönnunarfyrirtækið NORR11 opni sýningarsal og verslun við Hverfisgötu 18a í Reykjavík.

Fram kemur í tilkynningu NORR11 að fyrirtækið reki sýningarsali í Kaupmannahöfn, Berlín, London, Árósum, Lyngby og Tallinn. Reykjavík verði því sjöunda borgin þar sem opnaður verði sýningarsalur.

Framkvæmdir standa yfir í sýningarhúsnæðinu, sem er í portinu beint á móti Þjóðleikhúsinu. Sýningarsalurinn verður á tveimur hæðum í um 260 fermetrum.

Auk salarins stendur til að starfrækja íslenska vefverslun NORR11 og senda út um land allt.