Ekkert fékkst upp í kröfur

Engar eignir fundust upp í rúmlega 188,3 milljóna króna kröfur í þrotabú hönnunarfyrirtækisins ELM ehf.

Fyrirtækið var tekið til gjaldþrotaskipta í aprílbyrjun 2012 og lauk skiptum 10. þessa mánaðar.

ELM var stofnað árið 1999 og voru vörur hönnuðanna sem að fyrirtækinu stóðu seldar í um 140 verslunum víða um heim, en fyrirtækið rak einnig tvær verslanir, aðra í Reykjavík og hina í Ósló.

Auk hönnuðanna þriggja sem stofnuðu fyrirtækið átti fjárfestingarsjóður Auðar Capital hlut í fyrirtækinu.