Verri horfur um loðnuveiðar lækka hagvaxtarspá bankans

Hagfræðideild Landsbankans spáir rúmlega fjögurra prósenta hagvexti á næsta ári en ekki 5,5 prósenta vexti eins og gert var ráð fyrir í spá deildarinnar í maí síðastliðnum. Horfurnar fyrir næsta ár séu því heldur lakari sem skýrist að miklu leyti af mun verri horfum fyrir loðnuveiðar en deildin reiknaði áður með.

Þetta kemur fram í nýrri þjóðhagsspá bankans fyrir næstu þrjú árin sem kynnt verður í dag.

„Samkvæmt spánni verður meðalhagvöxtur á spátímabilinu tæp 3,5 prósent samanborið við 3,9 prósent í maíspánni. Að sama skapi eru verðbólguhorfurnar ágætar, að minnsta kosti framan af, þó hagvöxturinn verði nokkuð kröftugur allan tímann,“ segir í þjóðhagsspánni.

Þar er því gert ráð fyrir að hagvöxtur verði heldur meiri á tímabilinu en þau 2,9 prósent sem Seðlabankinn og Hagstofan gera ráð fyrir. Spárnar eru þó í meginatriðum svipaðar en Landsbankinn er bjartsýnni á þróun útflutnings á komandi árum.

„Á næsta ári er útlit fyrir að enn bæti í og vöxtur einkaneyslu verði fjögur prósent. Þessi aukning verður meðal annars knúin af hækkun ráðstöfunartekna og auknu veðrými vegna aðgerða ríkisstjórnar til skuldalækkunar hjá lántakendum verðtryggðra húsnæðislána, auknum kaupmætti launa, minnkandi atvinnuleysi og breytingum á skattkerfinu.“

Starfsmenn hagfræðideildarinnar búast einnig við því að kaupmáttur launa aukist í heild um 8,7 prósent og að fasteignaverð haldi áfram að hækka. Verðið hefur hækkað um rúm sex prósent að nafnvirði frá upphafi ársins en í spá bankans er gert ráð fyrir að hækkunin nemi 8,5 prósentum við næstu áramót. Verðið eigi svo eftir að hækka um 9,5 prósent á árinu 2015, 6,5 prósent á árinu 2016 og 6,2 prósent á árinu 2017.

Í spánni er einnig gert ráð fyrir að stýrivextir Seðlabankans verði óbreyttir fram á mitt næsta ár og að ólíklegt sé að aðstæður skapist fyrir frekari lækkun vaxtanna.

„Þess vegna spáum við því að stýrivextir hækki um 0,75 prósentustig á spátímabilinu og verði 6,5 prósent í lok árs 2016.“