Ódýrara að byggja fjölbýlishús en kaupa

„Byggingaverktakar eiga þessa stundina ekki að byggja einbýli eða raðhús heldur einblína á fjölbýlishús með mörgum hæðum og þá sérstaklega lyftuhús,“ segir Þröstur Sigurðsson hjá fjármála- og hagfræðiráðgjöf Capacent.

Hann kynnti greiningu Capacent á fasteignamarkaðinum á Framkvæmdaþingi Húsasmiðjunnar í gær. Þar kom fram að byggingarkostnaður þriggja til fjögurra hæða fjölbýlishúss er nú í fyrsta sinn frá árinu 2009 orðinn lægri en kaupverð fjölbýlis í Reykjavík. Enn hagstæðara er að byggja fjölbýlishús með lyftu.

„Þegar við skoðum einbýlishúsin þá er staðan allt öðruvísi því þar er byggingarkostnaðurinn enn talsvert hærri en kaupverðið. Á meðan svo er borgar sig ekki fyrir verktaka að fara út í framkvæmdir við einbýlishús,“ segir Þröstur.

Samkvæmt tölum Hagstofunnar, sem vitnað er í í greiningu Capacent, fjölgaði nýbyggingum á síðasta ári. Árin 2009-12 var hafist handa við samtals 901 íbúð en á síðasta ári voru íbúðirnar 1.520.

„Það að á árinu 2013 hafi útgefin byggingarleyfi verið fleiri en samanlagður fjöldi leyfa frá 2009-12 segir okkur að markaðurinn er að taka við sér.“

Þröstur bendir einnig á að í Reykjavík er skortur á íbúðum undir 120 fermetrum að stærð og þriggja herbergja íbúðum.

„Ríflega 35 prósent þeirra sem svöruðu könnun okkar og sögðust vera að leita að húsnæði, vilja vera í þriggja herbergja íbúð á höfuðborgarsvæðinu. Það er áberandi hvað það er mikil eftirspurn eftir þriggja herbergja íbúðum.“

Þröstur segir að gera megi ráð fyrir vaxandi eftirspurn eftir íbúðum á höfuðborgarsvæðinu þar sem íbúum borgarinnar fjölgar og íbúum á hverja íbúð fækkar.

„Ef þetta tvennt fer saman má gera ráð fyrir því að meðalþörf fyrir nýjar íbúðir aukist milli ára.“