Michael Putnam efstur í Mexíkó

Bandaríkjamaðurinn Michael Putnam hefur spilað gallalaust golf á fyrstu tveimur hringjunum á OHL Classic mótinu sem fram fer í Mayakoba í Mexíkó en hann er á 12 höggum undir pari þegar að mótið er hálfnað.

Putnam, sem hefur enn ekki fengið skolla í mótinu, sigraði á Mexíkóska meistaramótinu árið 2013 en hann nýtur þess greinilega að spila í Mexíkó.

Í öðru sæti koma þeir Shawn Stefani og Jason Bohn á 11 höggum undir pari en Ken Duke situr einn í fjórða sæti á tíu höggum undir.

Þá hefur gamla brýnið Fred Funk stolið senunni en hann er elsti þátttakandinn í mótinu um helgina, 58 ára að aldri. Hann lék frábært golf í gær og kom inn á 65 höggum eða sex undir pari en hann situr í níunda sæti á átta höggum undir pari.

Þriðji hringur á OHL Classic verður í beinni útsendingu á Golfstöðinni frá klukkan 19:00 í kvöld.