Krefjast aðskilnaðar austurhéraða frá Úkraínu

Úkraínskir aðskilnaðarsinnar sem hertóku ráðhús í borginni Donetsk um helgina, lýstu yfir sjálfstæðu lýðveldi í morgun. Forsætisráðherra Úkraínu sakar rússnesk stjórnvöld um að kynda undir átökum.

Mikið herlið á vegum Rússa er nú við landamærin að austurhéruðum Úkraínu og aðskilnaðarsinnar, sem vilja að þau segi sig úr lögum við landið, fóru inn í stjórnarbyggingar í Donetsk, Lugansk og Kharkiv. Á myndbandi frá hústökumönnum í Donetsk sést ræðumaður lýsa borgina sjálfstætt lýðveldi og hyggjast hinir sjálfskipuðu leiðtogar halda atkvæðagreiðslu um sjálfstæði þann ellefta maí næstkomandi. Á myndbandinu biðla fundarmenn til Pútíns Rússlandsforseta og segja hann síðustu von barna sinna, eins og sést í meðfylgjandi myndskeiði.