Steindi verður tengdasonur Sigga Sigurjóns

„Ég leik tilvonandi tengdason Sigga Sigurjóns, þetta er skemmtilegur karakter sem ég næ að tengjast vel,“ segir Steinþór Hróar Steinþórsson, betur þekktur sem Steindi, en hann fer með hlutverk í nýrri íslenskri kvikmynd sem ber titilinn Afinn.

Myndin er byggð á einleik Sigurðar Sigurjónssonar um Afann sem var geysivinsæll á sínum tíma. Höfundur leiksýningarinnar vinsælu, Bjarni Haukur Þórsson, skrifar handrit myndarinnar í samstarfi við Ólaf Egilsson.

„Ég held að fólk sé búið að bíða mjög lengi eftir því að fá alvöru íslenska gamanmynd sem er með kjöt á beinunum. Handritið að myndinni er mjög gott og stemning í hópnum er frábær, sem er mjög mikilvægt og góð stemning er mikilvægari en margir halda,” segir Steindi sem er spenntur að takast á við hlutverkið.

Þetta er þó ekki frumraun Steinda í kvikmyndageiranum því hann lék í myndunum Okkar eigin Ósló og Algjör Sveppi og töfraskápurinn. „Hlutverkið mitt í Afanum er töluvert stærra en þau hlutverk sem ég hef leikið í fyrri myndum.“

Afinn verður tekin upp á Íslandi og á Kanaríeyjum. „Ég hlakka svakalega til að fara til Kanaríeyja því eftir tökur ætla að reyna plata Sigga Sigurjóns í sangríu og á vindsæng,“ segir Steindi léttur í lundu.

Steindi vakti mikla lukku fyrir leik sinn í síðasta áramótaskaupi og hafa grínþættirnir hans, Steindinn okkar, einnig notið mikillar velgengni. „Það er mikill munur á því að leika í skets og í kvikmynd. Þegar þú tekur upp sketsa eru hlutirnir oft að fæðast á staðnum en undirbúningurinn fyrir svona kvikmynd er talsvert meiri,” segir Steindi en æfingar fyrir myndina standa yfir þessa dagana.

Ásamt Steinda og Sigurði skartar myndin leikurum á borð við Þorstein Bachmann, Pálma Gestsson, Sigrúnu Eddu Björnsdóttur og Tinnu Sverrisdóttur, sem leikur kærustu Steinda í myndinni. „Einnig leikur Jón Gnarr djúníór í myndinni en hann er upprennandi stjarna.”