Leggja til nýjan ríkisbanka og að Íbúðalánasjóður verði lagður niður

Tillögur verkefnisstjórnar um framtíð húsnæðismála kveða á um stofnun nýs ríkisbanka á húsnæðislánamarkaði og að Íbúðalánasjóður verði lagður niður í núverandi mynd.

Viðskiptablaðið greinir frá því að nýi ríkisbankinn muni ekki starfa með beinni ábyrgð ríkissjóðs samkvæmt tillögunum. Honum sé hins vegar ætlað að halda utan um skuldabréfaútgáfu í tengslum við hið svokallaða danska kerfi í húsnæðislánveitingum.

Fyrr í dag tilkynnti Fjármálaeftirlitið að öll viðskipti með skuldabréf útgefin af Íbúðalánasjóði hefðu verið stöðvuð tímabundið.

Þá greinir Kjarninn frá því að tillögur starfshópsins hafi verið til umræðu á fundi ríkisstjórnar í morgun.

Tillögur starfshópsins um framtíðarskipun á húsnæðismarkaði verði kynntar á blaðamannafundi í Safnahúsinu við Hverfisgötu klukkan 3 í dag.

Ráðgjafarfyrirtækin KPMG og Analytica eru meðal þeirra sem skiluðu skýrslu til verkefnisstjórarinnar. Í tillögum þeirra og greiningu var lagt til að útfært yrði nýtt húsnæðislánakerfi að danskri fyrirmynd þar sem húsnæðislán yrðu veitt af húsnæðislánafélögum. Þá var lagt til í skýrslunni að ÍLS yrði skipt í tvo hluta.

Formaður ASÍ fagnaði hugmyndum um danska kerfið en leyst ekki á að Íbúðalánasjóður hyrfi alfarið af lánamarkaði eins og fram kom í umfjöllun Fréttablaðsins.