Virkar áfengi sem svefnlyf?

Svefnleysi getur komið til af ýmsum ástæðum og ólíkir þættir geta stuðlað að svefnleysi. Oftast er um að ræða marga samverkandi þætti.

Almennt talað er svefnmynstur okkar viðkvæmt fyrir álagi og streituþáttum eins og erfiðleikum í persónulega lífinu, ágreiningi eða miklum breytingum í lífi fólks. Þá geta áföll á borð við ástvinamissi, hjónaskilnað, eða neysla vímuefna haft mikil áhrif á svefn fólks. Í flestum tilvikum lagast svefninn þegar þessir þættir lagast, eða þá að fólk aðlagar sig streituvaldinum og fer að sofa eðlilega á nýjan leik.

Algengur misskilningur er sá að eitt léttvínsglas að kvöldi geti hjálpað til við svefninn. Margir nota áfengi í þeim tilgangi að róa sig niður, enda er það vel þekkt staðreynd að áfengi hefur róandi áhrif á taugakerfið, að því gefnu að fólk hafi ekki myndað þol fyrir áfengi með reglulegri neyslu þess.

Áfengisneysla stuðlar að vökvatapi, þannig að fólk vaknar oft þyrst auk þess sem það þarf oftar að pissa á nóttunni.

Þegar áhrif áfengisins fara úr líkamanum taka fráhvörf við – þau geta lýst sér á margvíslegan hátt, meðal annars í léttari svefni, spennu og eirðarleysi sem hefur getur haft mikil áhrif á svefn, þá sérstaklega síðari hluta nætur. Þetta getur gerst þótt þú hafir aðeins drukkið eitt glas kvöldinu áður.

Þannig er mælt með því að sneytt sé hjá neyslu áfengis, að minnsta kosti nokkrum klukkustundum fyrir svefninn.

Langvarandi ofneysla áfengis raskar svefni töluvert. Eftir að áfengisneyslu er hætt, getur það tekið svefninn meira en ár að færast í eðlilegt horf.