Eiginkonan sem var rotuð stendur með manni sínum

Hlaupari Baltimore Ravens, Ray Rice, mun líklega ekki þurfa að fara í fangelsi fyrir að hafa rotað eiginkonu sína.

Hann sagðist vera saklaus er mál hans var tekið fyrir í dómssal í gær. Rice segist þó skammast sín fyrir það sem gerðist.

NFL-stjarnan hefur sótt um að komast í meðferð sem er ætluð þeim sem eru að brjóta af sér í fyrsta skipti. Ef hann kemst í hana, sem talið er líklegt, mun hann ekki þurfa að afplána neinn dóm í fangelsi.

Er Rice rotaði eiginkonu sína þá voru þau aðeins kærustupar. Þau giftust daginn eftir að hann var ákærður og hún stóð með honum í dómssalnum í gær.

Eiginkonan vill ekki að haldið verði áfram með málið. Þau hafi gert þetta atvik upp og vilji fá að halda áfram með líf sitt í friði.