Microsoft skiptir Internet Explorer út fyrir nýjan vafra

Microsoft þróar nú nýjan vafra sem ætlað er að koma í stað Internet Explorer. Nýi vafrinn gengur undir vinnuheitinu Spartan og mun að mörgu leyti líkjast öðrum vinsælum vöfrum líkt og Chrome og Firefox.

Vafrinn gæti líka hjálpað Microsoft að láta notendur gleyma sumum þeim slæmu minningum sem margir hafa um eldri útgáfur Internet Explorer vafrans. Microsoft hefur áður íhugað að breyta nafninu á vafranum vegna „neikvæðrar ímyndar sem á sér enga stoð í raunveruleikanum lengur“.

Í frétt ZDNet  segir að vafrinn verði kynntur þann 21. janúar þegar Microsoft mun kynna Windows 10 stýrikerfið. Þó er ekki víst að vafrinn verði tilbúinn til almennrar notkunar fyrr en eitthvað síðar.

Internet Explorer var fyrst kynntur til sögunnar árið 1995.