Grænt ljós á samruna 365 og Tals

365 miðlar og Tal hafa nú sameinast undir merki 365. Samkeppniseftirlitið heimilaði samruna félaganna í dag. Starfsmenn Tal munu flytja í höfuðstöðvar 365 í Skaftahlíð. Þetta kemur fram í tilkynningu frá 365 en starfsmönnum var kynnt um tíðindin á fundi síðdegis í dag.

Sævar Freyr Þráinsson, forstjóri 365, segir spennandi tíma framundan, bæði fyrir viðskiptavini og starfsfólk sameinaðs félags. Hann segir að í kjölfar þessarar sameiningar verði unnt að bjóða skemmtilegar nýjungar, sem ekki hafi sést áður á fjarskiptamarkaðnum, neytendum til hagsbóta.

„Miklar breytingar eru að verða á afþreyingar- og fjarskiptamarkaði og sameinuð munu félögin geta boðið viðskiptavinum  sínum upp á spennandi lausnir. Til að mynda eru miklar breytingar framundan á dreifingu sjónvarpsefnis þar sem snjalltæki eru í auknum mæli að taka við hlutverki hinna hefðbundnu myndlykla.“

Petrea Ingileif Guðmundsdóttir, framkvæmdastjóri Tals, tekur undir með Sævari.  

„Þetta hefur verið langt og strangt ferli og það er mikið ánægjuefni fyrir starfsmenn félaganna að nú hafi samruninn verið samþykktur. Ég hlakka til að setjast í framkvæmdastjórn sameinaðs félags og starfa á ný með Sævari forstjóra. Við erum þess líka fullviss að viðskiptavinir okkar verði ánægðir þegar í ljós kemur hvað þeim muni standa til boða. Hér eru að sameinast félög sem geta boðið upp á spennandi samspil afþreyingar og fjarskipta,“ segir Petrea.

Eina áþreyfanlega breytingin fyrir viðskiptavini félaganna fyrst í stað er sú að Tal mun flytja með skrifstofu og verslun úr Grímsbæ í höfuðstöðvar 365 í Skaftahlíð. Þar með verður stigið fyrsta skrefið í að samþætta þjónustu beggja fyrirtækjanna.

Viðskiptavinir 365 og Tals nota sömu samskiptaleiðir og áður til að hafa samband við fyrirtækin. Viðskiptavinir 365 hringja áfram í 512-5100 og fara inn á 365.is til að nálgast upplýsingar um vörur og þjónustu. Það sama gildir um viðskiptavini Tals, þeir hringja áfram í 1817 og fara inn á tal.is.

Nýjar áherslur sameinaðs félags verða kynntar strax á nýju ári.