Fyrstu myndir af nýjum Audi Q7

Audi mun kynna nýja gerð Q7 jeppans á bílasýningunni í Detroit sem hefst í næsta mánuði. Myndum af bílnum hefur hinsvegar verið lekið og því hefur Audi einnig látið frá sér allar upplýsingar um nýja bílinn.

Athyglisverðar breytingar eru á bílnum. Hann hefur lést um 325 kíló og vegur nú 1.995 kíló. Eyðsla hans hefur lækkað um allt að 28%, mismunandi þó eftir vélargerðum. Bíllinn er byggður á MLB 2 undirvagni sem smíðaður er að 41% hluta úr áli, en þetta er sami undirvagn og næsta kynslóð Porsche Cayenne og nýr Bentley jeppi munu fá.

Allar gerðir Audi Q7 jeppans verða fjórhjóladrifnar og með 8 gíra sjálfskiptingu. Afl 3,0 lítra dísilvélarinnar er nú komið í 268 hestöfl, en seinna mun einnig bjóðast aflminni 215 hestafla dísilvél í jeppann. Það tekur Q7 ekki nema 6,3 sekúndur að ná 100 km hraða með aflmeiri dísilvélinni, en samt er hún 23% eyðslugrennri en í núverandi kynslóð Q7.

Seint á næsta ári mun Audi Q7 fást með tvinnaflrás, þ.e. með dísilvél og rafmótorum og mun heildarafl þess verða 368 hestöfl og togið 700 Nm. Aka má þeim bíl fyrstu 50 kílómetrana eingöngu á rafmagni. Audi mun afhenda fyrstu Q7 jeppana af nýrri kynslóð í byrjun næsta sumars.