Fjallað um BIOEFFECT húðvörurnar í vinsælum sjónvarpsþætti í Kína

Ísland er eina landið í Vestur-Evrópu sem á sér kínverskt nafn, Bing-Dao sem þýðir bókstaflega ís-land. Þetta er eitt af því sem starfsmenn íslenska líftæknifyrirtækisins Sif Cosmetics komust að í heimsókn annarrar stærstu sjónvarpsstöðvar Kína til fyrirtækisins nú í haust.

Hópurinn var hér til að kynna sér íslensku BIOEFFECT húðvörurnar og vísindin á bak við þær. Fyrsti þátturinn um Íslandsheimsóknina var sýndur nýlega og óhætt er að segja að hann hafi verið mikil landkynning. Hægt er að horfa á brot úr þættinum með íslenskum texta hér að ofan og allan þáttinn á kínversku hér að neðan.

Þátturinn Dameiren, eða Drottningin á íslensku, er vinsæll lífstíls- og tískuþáttur sem er með um 12 milljónir áhorfendur á Hunan sjónvarpstöðinni í Kína. 12 manna lið frá sjónvarpsstöðinni dvaldi hér á landi í rúma viku við tökur í september síðastliðnum.

Með í för var ein frægasta leikkona Kína, Jiang Xin, sem hlaut kínversku sjónvarpsverðlaunin fyrir besta leik í aukahlutverki árið 2012. Afrakstur ferðarinnar verður sýndur í nokkrum þáttum Damerein á næstu vikum.

Í fyrsta þættinum var ítarleg umfjöllun um BIOEFFECT húðvörurnar og virkni þeirra. Gestir þáttarins sögðust sjá Ísland fyrir sér sem kalt, ... mjög kalt, hreint, fallegt, dulúðugt og hljóðlátt.

Rætt var við Dr. Björn Örvar, framkvæmdastjóra rannsókna- og vöruþróunarsviðs og einn stofnenda Sif Cosmetics í gróðurhúsi fyrirtækisins í Grindavík, um einstaka virkni BIOEFFECT varanna. Sýndar voru glæsilegar myndir frá Jökulsárlóni, Þingvöllum og öðrum vinsælum viðkomustöðum ferðamanna.

Mikið var fjallað um einstakan sköpunarkraft Íslendinga, sem sé nátengdur náttúru landsins og talað var við Steinunni Sigurðardóttur fatahönnuð og Þuríði Ósk Smáradóttur, leirlistamann um þeirra innblástur.

Í næstu þáttum verður m.a. rætt við Ragnheiði Elínu Árnadóttur iðnaðarráðherra, Ragnheiði Gröndal, Ragnhildi Steinunni, Högna og Sigríði í Hjaltalín auk starfsfólks Sif Cosmetics.