Opna dekurbar til heiðurs Skúla fógeta

Reykvíkingar fá nýtt öldurhús í barmenningu miðbæjarins í kvöld þegar Skúli Craft bar opnar klukkan 18. Staðurinn er staðsettur við Aðalstræti 9 í húsæðinu sem skilur að Fógetagarðinn kenndan við Skúla Magnússon og Ingólfstorg.

„Við ætlum að vera með rosalega gott úrval af góðum bjór, afskaplega gott, og þeir sem vilja ekki bjór geta komið hérna í gríðarlega gott úrval af léttvíni og sterku víni. Þetta verður algjör dekurstaður,“ segir Stefán Magnússon, oft kenndur við Eistnaflug. Stefán er rekstrarstjóri nýja barsins en meðal eigenda er Birgir Jónsson, trommari í Dimmu og aðstoðarforstjóri WOW air.

Bjórmekka í miðbænum

Varla hefur farið framhjá nokkrum manni hve hratt bjórflóran hefur vaxið á Íslandi undanfarinn áratug eða svo. Úrvalið af bjór hefur margfaldast og margir orðnir bruggarar og sérfræðingar.

„Þetta hefur gerst dálítið hratt síðustu ár og rosalega bjórmenning núna. Gríðarlegt magn af bjórnördum að koma niður úr trjánum sem er ofboðslega gaman. Að sjá þetta lið hræra upp úr glösunum og þefa. Þetta er bara eins og með vínið, algjörar spekúleringar en svo geturðu líka bara komið í þægilegan einfaldan bjór,“ segir Stefán. Hann minnir á að í miðbænum hafi myndast einskonar bjórhimnaríki.

„Miðbærinn er orðinn bjórmekka. Skúli er hérna, Micro í næsta húsi og Frederiksen beint á móti Húrra. Hér er risabjórsvæði.“

Ber að ofan í kvöld

Blaðamaður fór í óvænta heimsókn á barinn í hádeginu og komst að því að Stefán nokkrum mínútum fyrr fengið leyfisbréfið í hendurnar. Stefnt hafði verið á að opna staðinn fyrr en það tafist eins og gengur og gerist.

Áður var rekinn spilakassasalur, kenndur við Háspennu, í húsnæðinu þar sem nú er búið að innrétta barinn. Stefán á ekki von á því að um verði að ræða háspennubar.

„Ég held að þetta verði mjög notalegt. Þetta er þannig innréttað og flottur staður. Þú dettur bara inn í rólegheitagír og hefur það gott.“

Aðspurður hvort eitthvað sérstakt verði á dagkskrá í kvöld í tilefni opnunar, hvort hann muni klæðast jólasveinabúningi eða annað segir Stefán: „Ég verð jafnvel ber að ofan ég er svo ánægður með þetta.“