Tíu metra sitgagreni á Austurvöll

Dagur B. Eggertsson borgarstjóri hjó tíu metra hátt grenitré við Rauðavatn rétt eftir klukkan tvö í dag. Tréð var fellt til að prýða Austurvöll en Oslóartréð brotnaði í storminum sem gekk yfir landið í gær og nótt.

Tréð er af tegundinni sitgagreni en það mun vera á milli 50 og 60 ára gamalt. „Það stóð í grenilundi í landi norðan við Rauðavatn þar sem áður var sumarhúsabyggð en er nú útmörk Reykjavíkur. Borgin plantar 18 – 25 þúsund trjám ári að mestum hluta í útmörkina fyrir ofan Rauðavatn og á Hólmsheiði þannig að þar vex nú upp myndarlegur skógur,“ segir í tilkynningu frá Reykjavíkurborg.

Cecilie Landsverk, sendiherra Noregs á Íslandi, var viðstödd skógarhöggið og lýsti yfir ánægju sinni með tréð.

Greinarnar af Oslóartrénu sem brotnaði verða notaðar í jólaskreytingar í Tjarnarsal Ráðhússins. „Þá er einnig verið að skoða ýmsa möguleika á því að nýta tréð sem best, jafnvel með útskurðar- og smíðanámskeiðum fyrir börn.

Starfsmenn borgarinnar fara nú í að taka niður þessa vinargjöf Norðmanna sem brotnaði í látunum í gær og stilla nýja trénu upp á Austurvelli svo allt verði klárt fyrir hátíðlega fjölskylduskemmtun sem haldin verður á Austurvelli sunnudaginn 7. desember kl. 15:30 – 17 en þá verða ljósin kveikt á nýja trénu.“