Austurland: Designs from Nowhere hlaut Hönnunarverðlaun Íslands

Austurland: Designs from Nowhere hlaut Hönnunarverðlaun Íslands sem afhent voru rétt í þessu. Er þetta í fyrsta skipti sem verðlaunin eru afhent en athöfnin fór fram í Kristalsal Þjóðleikhússins.

„Designs from Nowhere eða Austurland, er verkefni sem snýst um að kanna möguleika til framleiðslu og atvinnuuppbyggingar á Austurlandi, þar sem notast er við staðbundin hráefni og þekkingu. Karna Sigurðardóttir vöruhönnuður og kvikmyndaleikstjóri og Pete Collard, listrænn stjórnandi hjá Design Museum í London áttu frumkvæði að verkefninu og fengu til liðs við sig hönnuðina Þórunni Árnadóttur, Max Lamb, Juliu Lohmann og Gero Grundmann til að þróa sjálfstæð verkefni í nánu samstarfi við handverksfólk og fyrirtæki á Austfjörðum,“ eins og segir í tilkynningu um verðlaunin.

Þá segir í umsögn dómnefndar að verkið sýni á sannfærandi hátt hvernig hlutverk hönnuða felist sífellt meira í því „efla sýn og auka metnað til framleiðslu. [...] Verkefnið, sem var bundið við Austurland, sýnir að með samstilltri sýn og virðingu fyrir menningu á hverjum stað, þar sem handverk, þekking og staðbundinn efniviður er kannaður til hlítar, felur í sér aukin tækifæri til að skapa framúrskarandi verk og hlýtur að vera hvatning öllum til handa.“

Dómnefnd Hönnunarverðlauna Íslands 2014 skipuðu þau Harpa Þórsdóttir, forstöðumaður Hönnunarsafns Íslands, Massimo Santanicchia, lektor í arkitektúr við Listaháskóla Íslands, Örn Smári Gíslason, sjálfstætt starfandi grafískur hönnuður, Laufey Jónsdóttir fatahönnuður og formaður Fatahönnunarfélags Íslands

Tinna Gunnarsdóttir, sjálfstætt starfandi hönnuður og kennari við Listaháskóla Íslands

Önnur verkefni sem tilnefnd voru til verðlaunanna voru Ljósmyndastúdíó H71a, Magnea AW2014 og Skvís.