Kveikt í bíl á Akureyri með Molotov-kokteil

Kveikt var í mannlausum fólksbíl með svonefndum Molotov-kokteil, eða bensínsprengju rétt fyrir klukkan fimm í morgun, þar sem hann stóð á bílastæði í íbúðahverfi á Brekkunni á Akureyri, og varð hann þegar í stað alelda.

Svo vel vildi til að  lögreglumenn á eftirlitsferð urðu eldsins strax varir og hringdu þegar á slökkviliðið sem slökkti eldinn, en bíllinn er ónýtur og kunna að hafa orðið einhverjar skemmdir á nálægum bílum.

Brennuvargurinn komst undan, en eiganda bílsins grunar hver hann er og er hans nú leitað. Að sögn lögreglu var þetta óvenju bíræfið og afar fátítt.