Jólapróf um átta þúsund stúdenta í uppnámi

Jólapróf um 8000 stúdenta eru í uppnámi komi til verkfalls prófessora við háskóla landsins en atkvæðagreiðslu þess efnis lýkur á morgun. Formaður Félags prófessora segir mikillar óþreyju gæta meðal sinna félagsmanna en ljóst er að verkfallið mun hafa mikil áhrif.

„Það mun auðvitað hafa mjög víðtæk og alvarleg áhrif komi til þess. Þetta lítur að öllum prófum í áföngum þar sem prófessorar eru umsjónakennarar, sem og öðrum prófum þar sem prófessorar koma að einhverju leyti að námskeiðinu. Verkefnaskil á þessu tímabili eru óheimil og svo framvegis. Þannig að áhrifin eru mjög víðtkæk," segir Rúnar Vilhjálmsson, formaður Félags prófessora við ríkisháskóla.

Atkvæðagreiðslunni lýkur á morgun en um 70% félagsmanna hafa þegar greitt atkvæði. Fastlega er reiknað með að verkfallsboðun verði samþykkt. Í félaginu eru allir prófessorar við ríkisháskóla á Íslandi.

Nemendur í Háskóla Íslands, Háskólanum á Akureyri, Hólaskóla og Landbúnaðarháskóla Íslands munu því finna fyrir áhrifum verkfallsins. Reiknað er með að jólaprófum um 8.000 nemenda frestist verði af verkfalli og því ljóst að ekki verður hægt að greiða út námslán til þessara nemenda. Rúnar segir prófessora vilja snúa til baka þeirri miklu kaupmáttarskerðingu sem félagsmenn hafi orðið fyrir undanfarin ár. Mikillar óþreyju gæti meðal prófessora.

Rúnar segist bjartsýnn á að hægt verði að afstýra verkfalli. Samskiptin við samninganefnd ríkisins hafi verið jákvæð, en þó sé ljóst að nefndina skorti umboð frá fjármálaráðherra til þess að ganga að kröfum prófessora.

„Það eru engir hurðaskellir og læti, menn hlusta vel hver á annan. En við höfum ekki fengið þessi formlegu viðbrögð við okkar kröfum sem við höfum óskað eftir, til þess að við getum tekið afstöðu til þess hvort við erum að ná saman eða ekki. Það þarf að gerast fyrst áður en við getum séð hversu mikið er á milli aðila," segir Rúnar.