Vodafone ekki lokað á síðurnar

Í ljósi frétta af dómi héraðsdóms í máli STEF gegn Vodafone fyrr í dag hefur Vodafone sent frá sér yfirlýsingu.

Þar kemur fram að jákvætt sé að niðurstaða héraðsdóms í máli STEFS gegn fjarskiptafyrirtækjunum sé fengin.

„Þar er komin afstaða dómstóla til flókins máls. Lögmenn okkar munu nú leggja mat á niðurstöðuna, áður en ákvörðun um næstu skref er tekin. Þess má geta að Vodafone hefur ekki lokað að umræddar vefsíður á þessu stigi málsins enda hefur sýslumaður enn ekki lagt á lögbann í samræmi við niðurstöðu dómsins.“

Í tilkynningunni segir að gera megi ráð fyrir að STEF fari fram á við öll fjarskiptafyrirtæki landsins að lokað verði á umræddar síður.

Héraðsdómur Reykjavíkur hefur kveðið upp úrskurð í máli Sambands tónskálda og eigenda flutningsréttar, STEF, gegn fjarskiptafyrirtækjunum Vodafone og Hringdu.

Þar kemur fram að lagt sé fyrir Sýslumanninn í Reykjavík að leggja lögbann á að umrædd fjarskiptafyrirtæki geti veitt viðskiptamönnum sínum aðgang að vefsíðunum www.deildu.net, www.deildu.com, www.thepiratebay.se, www. thepiratebay.sx og www.thepiratebay.org.