Eimskip og Samskip hafna ásökunum um samkeppnisbrot

Eimskipafélag Íslands og Samskip hafna því með öllu að hafa gerst brotleg við ákvæði samkeppnislaga og vísa á bug ásökunum um samráð. Kæruna hafi félögin ekki undir höndum og því geti félögin ekki upplýst um efni hennar né að hvaða einstaklingum hún beinist. Þetta kemur fram í tilkynningum frá félögunum.

Samkeppniseftirlitið hefur kært ellefu starfsmenn Samskipa og Eimskipa til sérstaks saksóknara fyrir stórfelld brot á samkeppnislögum, en RÚV greindi frá málinu í gær.

Samkvæmt kærunni hafa fyrirtækin skipt á milli sín viðskiptum við fyrirtæki og heilu landshlutana.

Í kærunni er minnst á kvartanir fyrirtækja vegna þess að þau hafi fengið samhljóða tilboð hjá Eimskipum og Samskipum. Einnig eru tiltekin dæmi úr innanhúsgögnum frá fyrirtækjunum þar sem áhersla er lögð á að hækka verð en ekki lækka og láta þar að auki ákveðin fyrirtæki og landsvæði eiga sig.