Lögreglumaðurinn hefur enn ekki verið yfirheyrður

Lögreglumaðurinn sem grunaður er um að hafa stungið sektargreiðslum í vasann í umdæmi lögreglunnar á Seyðisfirði hefur ekki enn verið yfirheyrður. Þetta segir Jónas Wilhelmsson, yfirlögregluþjónn á Eskifirði, sem fer með rannsókn málsins.

Jónas segir að rannsókn málsins gangi ágætlega en hann hefur áður upplýst að rannsóknin sé umfangsmikil. Málið kom innan lögregluembættisins á Seyðisfirði upp í lok ágúst og var tilkynnt til ríkissaksóknara. Því var svo vísað til rannsóknar hjá lögreglunni á Eskifirði.

„Við erum ekki búnir að sjá það,“ segir Jónas aðspurður um upphæðina sem lögreglumaðurinn er grunaður um að hafa tekið.