Ólafur Björn spilaði aftur á pari

Ólafur Björn Loftsson, kylfingur úr Nesklúbbnum, spilaði þriðja hringinn á 1. stigi úrtökumótsins fyrir Evrópumótaröðina á pari í dag.

Hann lék einnig á pari í gær og tveimur höggum undir á fyrsta degi og er því í heildina á tveimur undir pari eftir þrjá hringi. Hann er einn í fjórtánda sæti þegar örfáir kylfingar eiga eftir að klára í dag.

Ólafur Björn er áfram í góðri stöðu, en ríflega tuttugu kylfingar komast áfram af hans velli á 2. stig úrtökumótsins.

Hann var ekki nógu stöðugur í dag og gerði ekki nógu vel úr þeim sex fuglum sem hann fékk á hringnum í Frakklandi. Ólafur Björn fékk fjóra skolla til móts við alla fuglana og einn tvöfaldan skolla á 16. holu og spilaði því á parinu.

Daninn Martin Overser heldur þriggja högga forystu, en hann er á tólf höggum undir pari.