Ferðaþjónustan fær mun meiri tekjur en áður

Samkvæmt upplýsingum frá atvinnuvega-og nýsköpunarráðuneytinu stendur ekki til að skera niður fjárframlög til ferðaþjónustunnar.

Þrátt fyrir að Ferðamálastofa fái 126 milljónum minna á næsta ári en í ár er sá peningur enn eyrnamerktur ferðamálum þar sem hann fer beint til Íslandsstofu vegna kynningar-og markaðssóknar erlendis.

Ráðuneytið segir að aldrei hafi meiri pening verið varið til ferðamála en í ár; rúmur hálfur milljarður hefur til dæmis farið í uppbyggingu á innviðum ferðamannastaða.

Nýtt frumvarp sem lagt verður fyrir á haustþingi á síðan að skila ferðaþjónustunni umtalsvert meiri tekjum en nokkurn tímann áður. Hvernig það fyrirkomulag verður og hvenær það tekur gildi er í höndum Alþingis en ráðuneytið staðfestir að útfærðar tillögur séu ekki komnar fram.