Ytri Rangá gaf 72 laxa í gær

Það eru aðeins tveir dagar þangað til öðru agni en flugu verður hleypt í Ytri Rangá en veiðin síðustu daga hefur verið mjög góð.

Sem dæmi um góða veiði er gærdagurinn en þá veiddust 72 laxar í ánni en aðeins var veitt á 12 stangir.  Þetta er afbragðs veiði á þessum tíma og á þessu ári þegar smálax hefur vantað í árnar en athygli vekur að góður hluti þessara laxa eru nýlega gengnir.  Laxinn getur verið að ganga í ánna alveg fram í nóvember og haustveiðin er þess vegna oft mjög góður kostur og veiðileyfin að sama skapi ekki dýr.  Það sem gerist venjulega þegar fyrsta maðkahollið mætir í ánna er að veiðitölurnar taka góðann kipp upp á við og það er ekkert ólíklegt verði aðstæður góðar að fyrsti dagurinn gæti gefið 100 laxa á land.  Þannig dagar hafa verið árvissir í báðum Rangánum en samkvæmt okkar bestu upplýsingum hefur það ekki tekist í hvorugri ánni í sumar.  Það virðist vera nokkuð af laxi á fletum veiðistöðum í Ytri Rangá svo það verður spennandi að fylgjast með því sem gerist þegar annað agn en flugan fer í ánna.