Sveinn Andri krefur DV um tíu milljónir króna

Sveinn Andri Sveinsson lögmaður hefur stefnt ritstjóra DV og blaðamanni á DV vegna umfjöllunar um meint ástarsamband hans og sextán ára stúlku. Sveinn segir umfjöllunina brot á friðhelgi einkalífsins.

Sveinn Andri krefst tíu milljóna króna frá Reyni Traustasyni, ritstjóra DV, og Viktoríu Hermannsdóttur, blaðamanni á DV, vegna umfjöllunarinnar. Umrædd umfjöllun birtist í helgarblaði DV í ágúst síðastliðnum þar sem rætt var við stúlkuna, sem í dag er nítján ára gömul. Sagði hún Svein Andra föður eins og hálfs árs gamals sonar hennar og birti meðal annars tölvupóstssamskipti sem á milli þeirra fóru. Þá greindi hún frá því að Sveinn Andri hefði ekki viljað taka þátt í lífi barnsins og óskað eftir því að hún færi í fóstureyðingu.

„Ég hef svarað honum og við höfnum þessu alfarið. Við ætlum ekki að biðja hann afsökunar. En honum er velkomið að útskýra fyrir þjóðinni hvernig það gerist að maður á þessum aldri, líklega fimmtugur, er í sambandi við jafn ómótaðan einstakling og sextán ára stúlka hlýtur að vera,“ segir Reynir Traustason, ritstjóri DV.

Sveinn Andri vildi ekki tjá sig um málið þegar eftir því var leitað.