Ólíklegt að skuldaleiðréttingin verði dregin til baka

Tryggvi Þór Herbertsson, verkefnisstjóri um framkvæmd höfuðstólslækkunar íbúðalána, sagði í viðtali hjá RÚV í dag að hugsanlegt sé að hluti aðgerða ríkistjórnarinnar, þ.e skuldaleiðréttinga, verði tekinn til baka fáist ekki fjármögnun fyrir þeim. Frestur til að sækja um leiðréttingu rann út í fyrradag og bárust hátt í 70 þúsund umsóknir frá rúmlega 100 þúsund manns í 61 landi.

Líkt og fram kom í fréttum RÚV í gær ætlar þrotabú Glitnis að láta reyna á bankaskattinn fyrir dómi, en hann verður notaður til að fjármagna lækkun á höfuðstóli húsnæðislána.

Tryggvi er þó ekki jafn afdráttarlaus í samtali við Vísi og segir fólk engar áhyggjur þurfa að hafa. Vissulega séu líkur á að illa geti farið en á því séu hverfandi líkur.

„Ég tel engar líkur á því að þetta verði dæmt ólöglegt, það er samhengið. Þjóðarríkið hefur gríðarlega sterkan rétt til að leggja skatta á borgarana og fyrirtæki. Og þetta er bara þannig að staðið að við höfum engar áhyggjur af þessu,“ segir Tryggvi.

Hann segist ekki hafa skilið formann slitastjórnar þannig að búið væri að ákveða að höfða dómsmál. „Slitastjórn Arion og Landsbankans hafa sagt að það hafi ekki komið neitt til tals að fara út í mál og það séu engar hugleiðingar um það. Slitastjórn Glitnis talaði um það að það væri, þegar skatturinn yrði lagður á, þá yrði afstaða tekin um það hvort farið yrði í mál.“

Stjórnmálamenn mótfallnir aðgerðunum létu ekki á skoðunum sínum standa þegar aðgerðir voru kynntar og gagnrýndu þær harðlega. Töldu þeir bankaskattinum betur varið í niðurgreiðslur skulda ríkissjóðs. Þá lá það nokkurn veginn fyrir að höfðað yrði mál á hendur ríkisins af hálfu bankanna. Aðspurður hvort ekki hafi þurft að grípa til einhverra ráðstafana, fari svo að dómsmál yrði höfðað, segir hann svo ekki vera.

„Okkar færustu sérfræðingar fóru yfir þetta og töldu engar líkur á því að við myndum tapa dómsmáli sem þessu. Við höfum engar áhyggjur af þessu.“