„Ljóst er að innanríkisráðherra er vanhæf og rúin trausti"

Píratar hafa sent frá sér tilkynningu þar sem kemur fram að flokkurinn hyggst leggja fram tillögu um vantraust á Hönnu Birnu Kristjánsdóttur, innanríkisráðherra.

Fram kemur í tilkynningunni frá Pírötum að ljóst sé að ráðherra sé vanhæf og rúin trausti. Alþingi kemur saman á ný þann 9. september.

Hér að neðan má lesa tilkynningu flokksins í heild sinni:

Í ljósi atburðarásar undanfarna daga og mánuði hefur þingflokkur Pírata verið að undirbúa tillögu um vantraust á innanríkisráðherra. Tillagan verður lögð fram þegar þing kemur saman í næsta mánuði.

Ljóst er að innanríkisráðherra er vanhæf og rúin trausti í samfélaginu og því er ekki boðlegt að ráðherrann segi aðeins frá sér hluta af starfskyldum.

Þegar um traust, eða vantraust, til ráðherra er að ræða, gildir ekki reglan ‘saklaus uns sekt er sönnuð’ eins og gildir um almenna borgara, heldur þarf ráðherra að njóta trausts og vafi af þeirri stærðargráðu sem nú er uppi um traust til ráðherrans er skaðlegur stjórnkerfi landsins.

Ákvörðun þingflokks Pírata um vantraustsyfirlýsingu er ekki eingöngu byggð á formlegri ákæru á hendur aðstoðarmanni ráðherra heldur viðbrögðum ráðherrans í orðum og athöfnum frá því málið kom fyrst upp.

Nú er ljóst að ráðherra hyggst afgreiða málið með hætti sem þingflokkur Pírata telur óásættanlegan með hliðsjón af því sem á undan er gengið.

Því telur þingflokkur Pírata ekki annað fært en að leggja fram tillögu um vantraust á ráðherrann, á fyrsta degi haustþings, 9. september 2014 og mun þá færa nánari rök og gögn fyrir vantraustinu.