Argentínska ríkið í greiðsluþrot í annað sinn

Ríkissjóður Argentínu er nú kominn í þrot eftir að ekki tókst að semja við bandaríska kröfuhafa. Þetta er í annað sinn sem það gerist síðan 2001, fyrir þrettán árum síðan. Um þetta er fjallað í grein Wall Street Journal.

Árið 2001 varð argentínska ríkið gjaldþrota eftir að vaxtagreiðslur skuldabréfa sem seldust fyrir rúma 132 milljarða Bandaríkjadala, eða um 15.180 milljarðar íslenskra króna, reyndust því ofviða.

Í kjölfar gjaldþrotsins bað ríkið lánadrottna sína að skipta út skuldabréfum sínum fyrir ódýrari skuldabréf, sem voru rúmlega 70% rýrari að virði. Flestir þeir fjárfestar sem áttu skuldabréf tóku þessu - því vissulega er jú betra að tapa sjötíu prósentum en hundrað prósentum.

Vogunarsjóðir krefjast fulls verðs

Þó voru nokkrir vogunarsjóðir, sem samtals áttu skuldabréf fyrir 1.5 milljarð dala, eða um það bil 170 milljarða króna, sem kröfðust þess að fá fullt verð skuldabréfa sinna greitt til baka. Sjóðirnir hafa staðið í málaferlum í heil þrettán ár. Í síðasta mánuði dæmdi bandarískur dómstóll vogunarsjóðunum í vil, svo loks náðu þeir sínu fram.

Eftir ákvörðun dómstólsins hafa fulltrúar argentínska ríkisins fundað stíft með fulltrúum vogunarsjóðanna, til þess að semja um niðurstöðu í málinu. Axel Kicillof, efnahagsráðherra Argentínu, var í fararbroddi samningahóps sem hélt til New York til fundar. Vogunarsjóðirnir hafa verið harðir, og heimtað fullt verð skuldabréfanna án þess að gefa nokkuð eftir. 

Í gærkvöldi lauk fundum með þeirri niðurstöðu að kröfuhafarnir samþykktu engin tilboð efnahagsráðherrans, svo nú neyðist Argentína til þess annað hvort að greiða skuldirnar ellegar lýsa yfir greiðsluþroti í annað sinn. Ríkið valdi seinni kostinn.



Hvaða áhrif hefur greiðslufallið?

Kreppuástand ríkir nú þegar í efnahag Argentínu, og greiðsluþrotið mun auka þrýsting á argentínskan almenning. Það gæti leitt til aukinnar verðbólgu sem og veikari gjaldmiðils. Greiðslufallið gæti minnkað hagvöxt um rúmlega heilt prósent, að sögn fyrrverandi seðlabankastjóra Argentínu.

Sitjandi forsætisráðherra Argentínu, Cristina Kirchner, gæti átt erfitt með að ná endurkjöri í komandi kosningum eftir að tilraunir til þess að rétta af efnahag ríkisins fóru á þennan hátt.

Ekki er þó búist við miklum mótmælum í helstu borgum Argentínu. Flestir landsmenn eru á þeirri skoðun að efnahagsástand ríkisins sé sök alheimsmarkaðskerfisins fremur en stjórnmálamanna.