Ryanair með jákvæða afkomuviðvörun

Vel gengur hjá stærsta lággjaldaflugfélagi Evrópu, Ryanair, en hagnaður írska flugfélagsins meira en tvöfaldaðist á öðrum ársfjórðung þessa árs. Hagnaðurinn nam 30,6 milljörðum króna en var 12,1 milljarðar í fyrra.

Ekki er þessi góða afkoma Ryanair í takti við gengi margra annarra flugfélaga í Evrópu en nýverið greindu Air France-KLM og Lufthansa frá minni hagnaði er spár þeirra gerðu ráð fyrir. Ný spá um hagnað Ryanair á þessi ári hefur verið hækkuð frá 90-97 milljörðum króna í 97-101 milljarð króna.  

Ryanair ætlar áfram að auka sætaframboð sitt næsta vetur og verða 8% fleiri sæti í boði, bæði á núverandi og nýjum flugleiðum. Í fyrra hóf Ryanair að kynna farþegavænni þjónustu sem markaði mikla stefnubreytingu á þjónustu þess og virðist sú stefna ætla að skila félaginu tilætluðum árangri.