87 kílóum léttari

Pawn Stars-stjarnan Corey Harrison var rúm 180 kíló fyrir fjórum árum. Þegar hann var settur á lyf til að hindra að hann fengi sykursýki ákvað hann að fara í magabandsaðgerð.

„Ég keyrði bókstaflega frá lækninum og á staðinn þar sem magabandsaðgerðir eru gerðar og fór í aðgerð nánast strax,“ segir Corey í viðtali við tímaritið People.

„Þá var aðgerðin of dýr fyrir mig þannig að ég þurfti að borga hana með fjórum kreditkortum. En þetta var eitthvað sem ég þurfti að gera - ég var að fá sykursýki!“ bætir hann við.

Corey léttist um tæp 23 kíló á fyrstu sex vikunum eftir aðgerðina og síðan önnur 45 kíló innan árs. Í dag er hann búinn að léttast um 87 kíló og segist aldrei ætla að snúa aftur til fyrri lifnaðarhátta.